Debagoienean kirol arloan lanean diharduten pertsonak, kirolariak eta kirol sustatzaileak saritzeko eta txalotzeko sortu ziren 2008 urtean Debagoieneko kirol sariak. Sariketa da elkarlanaren ondorioa, egitasmo publiko eta pribatuaren arteko jardunaren emaitza zuzena.
Izan ere, Debagoieneko bost udalen Leintz-Gatzaga, Aretxabaleta, Aramaio, Oñati eta Elgeta – , La Caixa erakundearen, Kobate-Kanpanzar harrobiak enpresen, Goienaren eta Arteman Komunikazioa enpresaren elkarlanari esker egingo da aurtengo edizioa ere.
Aramaioko Kultur Etxean
DKS’10 Aramaioko Kultur Etxean egingo da, urtarrilaren 21ean, arratsaldeko 7etatik aurrera. Musika, kirola, umorea eta emozioa uztartuko dira ekitaldian, eta antolatzaileen asmoa da kirolari zein kirol arloan diharduten pertsona guztiak bertara gonbidatzea.
13 sari banatuko dira
Guztira hamahiru sari banatuko dira urtarrilaren 21ean Kultur Etxean egingo den ekitaldian. Ordurako, herritarrek euren proposamenak egingo dizkiote epaimahaiari, herritarren saria proposatzeko aukera izango dute eta udalek ere aukeratuko dituzte zeintzuk sarituko dituzten.
Proposamena egiteko aukerak
Aurtengo edizioan, herritarren saria jasoko duen pertsona proposatzeko aukera edo bide bakarra egon da. Horretarako, webgune honetan ikusgai egon den formulario bat bete behar izan dute interesatu guztiek. Bertan, ez dute zerrenda itxirik aurkitu eta norberak aukera izan du nahi duen kirolariaren izena proposatzeko.
Eskerrik asko parte hartu duzuen guztioi! Laster jakingo dugu zeinek irabazi duen herritarren kirol saria.
