Edukira salto egin | Salto egin nabigazioara

Tresna pertsonalak

Eibarko peoria, San Blasa baino hobia
Hemen zaude: Hasiera / Blogak / Eibartik / Euskaldun bat Katalunian, konparatzen

Euskaldun bat Katalunian, konparatzen

Asier Sarasua 2015/08/11 16:55
Euskalduna Kataluniara doanean, ezinbesteko du konparatzen hastea. Derrigorrezko, berezko. Zertan garen berdin, zertan ezberdin. Batzuetan jakinminez, besteetan harrotasunez, askotan enbidiaz. Gaur goizean gertatu zait, adibidez, 5 ohar mental hartu ditudala jaiki eta armosatu bitartean.
Euskaldun bat Katalunian, konparatzen

Senyera, Vulpellac (Empordá, Girona)

1.- Sinboloak ez ei dira garrantzitsu. Bai zera! Eta Katalunia sinboloz beteta dago. Goiz erdirako ikusi dituzu 10 samarreta independentista eta hamaika senyera. Etxeak eta kaleak; eraikin ofizialak eta entitate pribatuak; bide-bazterrak eta biribilguneak. Dena dago senyeraz josita, lepo. Izan estelada edo izan izarbako, ez dago herri sarrerarik bere senyera barik. Gurean, azkenaldian, ez ote garen lotsatzen ikurrina ateratzeaz; folklorismo hutsa delako aitzakiaz.

2.- Banderen legea zintzo betetzen dugu euskaldunok, alajaina! Hemen, ostera, (Gironako herri txikietan, behinik behin), ez da ageri inon piperpotorik. Legeari zirkin egiten dionik bada, bai; edo intsumisioa lege bihurtzen duena.

3.- Kafetegira sartu, kafetxoa eskatu. Atzetik Afrika erdialdeko gazte bat. Sartu bezain azkar hizkuntza hegemonikoan mintzatu da. Bon dia. Un cafe amb llet. Integratu behar duenak badaki zein den integraziorako hizkuntza, zein hizkuntza hegemonikoa. Bon dia.

4.- Euskaldun honek, bien bitartean, egunkaria hartu du. Azalean gai bakarra: 27ko hauteskundeak, 11ko Diada, eta independentziarako bidezidorra. Barruan, iritzi-zutabeen artean, "Basquitis" izenekoa. Tesia, labur-labur: euskaldunak ondo konpontzen dira Espainiarekin. Ez dute nahi independentziarik, eta ezta Kataluniarena ere. Traidore hutsak dira. Garai batean begiradak Mediterraneotik Kantaurira zuzentzen zituzten; gaur egun ez da halakorik.

5.- Tabernatik irtetean, bi magrebtar ate alboko mahaian jarrita. Kafea ez, tea eskatu dute. Egunkaria dute eskuetan eta euretako bat adi-adi ari da irakurtzen azala. Tabernako egunkari guztiak katalanez daude. Hori bai hizkuntzan murgil egitea.

Eta, horrela, goiza, konparatzen. Nahiezta.

Amatiño
Amatiño dio:
2015/08/12 00:10
Ni, oro har, bat etorri naiteke bost ohar horiekin. Hala ere, ñabardura labur bi:

Bat. Nik egunero egiten dut Gipuzkoatik Bizkaira bitarteko joan-etorria eta, nabarmen gero, Bizkaian Gipuzkoan baino askoz ere ikurrin gehiago dago. Eibartik Donostiara joan daiteke batere ikurrinik ikusi gabe. Eibartik Muskizera, ostera, takian potian daude.

Bi. Kataluniak eta Euskal Herriak erritmo desberdinak dituzte. Aurrenengoa, eta oinarriz-oinarrizkoa, guk ez diogula amore eman --moduren batez edo bestez-- "zazpiak bat" delakoaren aldarrikapen politikoari. Eta beraientzat, ordea, katalan herrien kultura-historiari muzin egin gabe, Kataluniaren egitasmo politikoa euren "lauak bat" baino ez da. Gure aukera zailagoa da, nekezagoa, eta ez dut uste eurena abertzaleagoa denik.

Nik ez dakit zein den erritmorik egokiena edo aproposena, baina ez dut inondik ere onartzen beraien unean uneko erritmoak izan behar duenik unean uneko ERRITMO baliozkoa. 1979ko Konstituzioa erabakitzerakoan gure kontzertu ekonomikoak "zaharkitutzat" jo zituzten. Hogei urte geroago, gure enbidiaz hasi ziren. Beste hamar urte geroago, gure sistema berbera aldarrikatu zuten. Eta lortu ez dutenean, jo eta pasa egin nahi dute (ikusiko dugu zelan amaitzen den).

Beraz... traizio kontuetan... zozoak beleari, ipurbeltz.
Egoitz Unamuno Loidi
Egoitz Unamuno Loidi dio:
2015/08/12 12:23
Oso alderaketa interesgarria Asier. Beti da bixigarria Kataluniara begiratzea. Norabaitera begiratzekotan...

Joan zen urtean Gironako kanpin batean pasatu genituen 10 bat egun eta, besteak beste, katalunierazko El Punt Avui egunkariak eman zidan atentzioa, edo inbidia sanoa. Katalunierak komunikabideetan duen lekua ez da batere neurgailu txarra kataluniar nazioaren bizindarra neurtzeko, ezta gurearekin konparatzeko ere.
 
Jozulin
Jozulin dio:
2015/08/14 13:44
Hauxe idatzi nuen blogean 2005 urruti hartan. http://jozulin.eus/2005/08/a-catalunya/
(Caprabo hipermerkatuen kasua aipatzen da bertan, argitu behar da artean ez zela Eroskirena)
Serafin
Serafin dio:
2015/08/14 17:31
Oso ona Asier. Konparaziñuan galtzen urtetzen juagu euskaldunok. Háren onduan ezer gitxi gaittuk. Nik enbidixaz begiratzen jetsat Kataluinari.
gorkaazk
gorkaazk dio:
2015/08/21 10:18
Kataluniara aspaldi joten ginen. Anaietako bat bertan ibili zen lanean, bi urtez. Banderen kontuez ez naiz akordatzen, egoera soziolinguistikoaz bai ordea.

Gogoratzen naiz, esate baterako, lehen kontaktuaz. Gasolindegi batean bideari buruzko argibide batzuk eskatu, gaztelaniaz, eta bertoko neska gazteak katalanez erantzun zidan, adeitsu. Gaztelaniaz nola edo hala errepikatu argibideak ondo ulertu ote nituen ziurtatzeko eta neskak berriro ere oso adeitsu emandako azalpenak berretsi.

Zirrara.
Iruzkina gehitu

Erantzuna formulario hau betez utzi dezakezu. Formatua testu arruntarena da. Web eta e-posta helbideak automatikoki klikagarri agertuko dira.

Galdera: Zenbat dira hogei ken bi? (idatzi zenbakiz)
Erantzuna:
Aurkezpena

Eibar, Euskalkiak, Natura, Etnografia

Asier Sarasua Aranberri

Eibar, 1969. Naturzalea txikitatik; txorizalea joan zen mendetik; euskaltzalea betidanik. Sasibiologoa eta sasifilologoa. Txoriak ez ezik, txori-izenak ere behatzen ditut han-hemen. Blogroll ibiltari bat ere banaiz.

..........................

Blog honetako testu original guztien lizentzia: Creative Commons by-sa.

Somerights20

..........................

Blog honetako gai nagusiak

Sarean

Asier Sarasua Aranberri Twitter

Asier Sarasua Aranberri Flickr

Asier Sarasua Aranberri Facebook

Liburu eta proiektuak
Lehen Hitza Euskaraz