Abokatuak batu dira ofiziozko txandaren alde egiteko

BILBO. Berrogei bat abokatuk elkarretaratzea egin zuten Bilboko Justizia Jauregiaren aurrean atzo, beren lanbidearen eta bereziki ofiziozko txandaren «duintasuna» aldarrikatzeko. Besteak beste, ordainsariak parekatzeko, jarduketa guztiak salbuespenik gabe kobratu ahal izateko, polizia etxeetan atxiloturik daudenei zerbitzua eskaintzeko bideak hobetzeko, eta euskararen normalizazioa eta «abokatuen lana eta familia bateragarri» egiteko neurriak hartzeko eskatu dute. Iñigo Santxo abokatuak gogorarazi zuen ofiziozko txandaren eskumena Jaurlaritzaren esku dagoela 1987tik: «Atzerapen handia daramagu. Eskumenak ezin dira izan besteek egiten dutena berdin egiteko, herritarrei zerbitzu hobea eskaintzeko baizik. Ez da posible Espainian egiten dutena kopiatzea, eta gero harritzea hemen ere protestek eztanda egiten dutelako».