Aita, ama edo bi gurasoak kartzelan dauzkate 105 umeak dira haur motxiladunak. Gainera, haietako bost amarekin espetxean bizi dira, tartean Xua. Egun, Picassenteko (Valentzia, Herrialde Katalanak) espetxean dago, baina urtarrilaren 19an hiru urte beteko dituenez, ezingo du bertan jarraitu. Hori dela eta, 1.200 kilometro egin beharko ditu gurasoak bisitatu behar dituen bakoitzean. Xua gurasoekin etxera plataforma sortu dute egoera salatzeko eta hirurek etxera itzuli behar dutela aldarrikatzeko. Izan ere, Xuaren aitak eta amak dagoeneko beteta dauzkate zigorraren hiru laurdenak.
Hainbat ekitaldi antolatu dituzte ume motxiladunen egoera salatzeko, eta Porrotxek eman du horien berri gaur, Donostian. Hain zuzen, abenduaren 28an izango da lehenengoa. Donostiako Bulebarretik kalejira bat egingo dute, 12:00etan hasita. Urtarrilaren 19an, berriz, haur motxiladunak protagonistak izango dira Donostiako Atano pilotalekuan egingo duten ekitaldian.
