Lezetxiki

"MUniversitas", Mondragon Unibertsitateko aldizkaria

Lau hilabetetik behin Mondragon Unibertsitateak MUniversitas aldizkaria kaleratzen du ikasle, guraso eta enpresa laguntzaileen artean banatzeko. Argitalpenaren nondik norakoak ezagutzeko, Joxe Aranzabal, HUHEZIko komunikazio arduraduna eta MUniversitas -eko koordinatzailea elkarrizketatu dugu. Ikus-entzunezkoaren fitxa teknikoa: - Elkarrizketatua: Joxe Aranzabal ( HUHEZI ko komunikazio arduraduna eta MUniversitas -eko koordinatzailea). - Lokalizazioak: Mondragon Unibertsitate ko HUHEZIko fakultatea (Eskoriatza). - Irudiak: Panasonik-Lumix DMC-FZ18 argazki-kamerarekin hartuta. - Bideoaren edizioa: iMovie 4.0.1. - Soinu-banda: Brandenburg (Beirut ) . - Eskubideak: Copyleft . - Egilea: GoioArana . - Iraupena: 01:30.  2008/01/02 - 08:47:03

Miro: telebista, ordenagailuan

Ordenadorean, RSS bidez , telebista ikusteko aukera ematen du Miro -k. Oso erraza da software librean egindako programa hau erabiltzea: 1 - Deskargatu programa. 2 - RSS sindikazioa eskaintzen dituzten munduko telebistetan harpidetu. 3 - Deskargatu aukeren artean dauden gustuko telebista-saioak. 4 - Nahi dugun tokian eta nahi dugun unean telebista ordenadorean ikusi. Telebista ikusteko modu berritzaile honi buruz Iban Arantzabal GOITBko zuzendariarekin hitz egin dugu. Ikus-entzunezkoaren fitxa teknikoa: - Elkarrizketatua: Iban Arantzabal ( GOITB ko zuzendaria). - Lokalizazioak: Arteman Komunikazioa eta Goiena Telebista . - Irudiak: Panasonik-Lumix DMC-FZ18 argazki-kamerarekin hartuta. - Bideoaren edizioa: iMovie 4.0.1. - Soinu-banda: No cars go (Arcade Fire) . - Eskubideak: Copyleft . - Egilea: Goio Arana.  2008/01/02 - 08:47:03

Sei webgune interesgarri

Irrati, telebista eta, orokorrean, ikus-entzunezkoen gainean sei webgune erabilgarri bildu ditut. Hamaika ikus-entzuteko jaioak http://www.goiena.net/blogak/hamaika Gutxi dira euskal blogosferan telebista eta irratia, propio, jorratzen dituzten blogak. Edorta Arana kazetaria eta EHU ko irakaslearen Hamaika ikus-entzuteko jaioak bitakora horietako bat da. Denetariko ikus-entzunezko hedabideak izaten ditu aztergai Edorta Aranak baina, bereziki, euskal hedabideetan erreparatzen du. Bere mezuetan, informazioa, iritzia eta kritika uztartzen ditu. Miro.com http://www.miro.com Etorkizunean telebista ikusiko dugun moduan ikusteko aukera ematen digu, dagoeneko, webgune estatubatuar honek: norberak nahi duen saioa, nahi duen unean, irudi kalitate handiarekin eta... ordenadorean, RSS bidez. Oraingoz, batez ere, Ipar Amerikako telebista kateak daude aukeran baina, gero eta gehiago dira era berri hau eskaintzen ari direnak. Gezurra badirudi ere, euskarazko tokiko Goiena Telebista (GOITB) da, oraingoz, gure artekoetatik zerbitzu hau ematera animatu den bakarra. Zeri begira daude beste telebista kate guztiak? Irratia.com http://www.irratia.com/ Euskal Herrian internetez bidezko irratia eskaintzen aitzindaria izan da Irratia.com . Webgune honek, ohiko irratsaioak entzuteko aukera emateaz gain, RSS bidez musikari buruzko albisteak jasotzeko bidea ere eskaintzen du, gainera, artxiboan dituzten podcast mordoa eskuragarri jarri dituzte. Euskalbar http://www.interneteuskadi.org/euskalbar/ Ez da Euskalbar , bereziki, ikus-entzunezko gaiarekin lotutako webgunea baina, ezinbesteko tresna da ikus-entzunezkoetan euskaraz jardutea nahi duen edozein kazetariarentzat. Egun gutxi dela gainera, utilitate honen 3.0 bertsioa kaleratu dute. "Euskalbar", Firefox nabigatzailearen osagarria dugu eta, behin instalatu eta gero tresna-barra bat agertzen da menuaren azpian modu errazenean jartzen dituena eskura euskara-gaztelera eta gaztelera-euskara itzulpenak egiteko hainbat baliabide, hala nola euskalterm , 3000 eta Elhuyar hiztegiak, Euskaltzaindia , ItzuL , Harluxet , Mokoroa eta ZT Corpusa datu-baseak edo XuxenWeb zuzentzailea. Euskaltube http://www.euskaltube.com/ Haritz Rodriguez internauta euskaldunak bideoak partekatzeko Youtube -ren klon euskalduna sortu berri du: Euskaltube.com . Modu apalagoan bada ere, webgune euskaldun honek "Youtube" handi eta arrakastatsuaren antzeko zerbitzuak eskaintzen ditu baina, erabiltzaile euskaldunentzat bereziki zuzenduta. Honelako moduko euskaldunentzako egindako gune berezituen egokitasuna, hala ere, ezbaian jarri dute han-hemenka. Odeo http://www.odeo.com Podcast -ak entzun, gorde eta kudeatzeko webgunea da Odeo.com . Behin doako harpidetza egin eta gero, erabiltzaile has daiteke soinu-dokumentuak biltzen edo, adibidez, bere blogean, aldez aurretik "Odeo"-en gorde dituen soinu-dokumentuak zintzilikatzen. Entzungarri dauden milioika podcast-ei komentarioak egiteko aukera ere badago.  2008/01/02 - 08:47:02

Nabigatu euskaraz