Zientzia eta teknologia

Zientzia eta teknologia kontuez informatzen dutenak

Astroargazkilaritza tailerra Elgetan bihar

Bihar (urtarrilaren 29an) arratsaldeko 18:30etan hasita, astroargazkilaritza tailer bat egingo dut Elgetako liburutegian. Nire lehenengo mota honetako tailerra izango da, beraz ez espero ezer profesionalik. Doakoa izango da eta adin tarte guztietarako. Hori bai, 10 urtetik beherako haurrek heldu baten laguntzarekin azaldu beharko dute. Astroargazkilaritzan edo orohar astronomian interesik baldin baduzu, aukera ezin hobea duzu bihar Elgetan mundu honetan pixka bat gehiago sakondu eta ikasteko. Astroargazkilari amateur moduan egin ditudan azken 4 urteetako esperientzia kontatuko dut modu praktiko batean, eta hasieratik izan nituen zalantza eta oztopoak nola igaro nituen esango dizuet. Oso tailer praktikoa izango da, eta mota honetako argazki bat atera ahal izateko beharrezkoa den ekipoa zein den, nola muntatu eta konfiguratu behar den eta beste hainbat xehetasun aipatuko ditut. Horretarako momentu honetan esku artean dudan teleskopioa eta ekipo konplexua erabiliko dut, baina norberak eskura duena (argazki kamera bat eta tripode bat adibidez) eramatea gomendatzen dut nirekin batera prozesu osoa jarraitu ahal izateko. Bakoitzaren kasura egokitzen saiatuko naiz eta astroargazki paregabe bat atera ahal izateko norberak eman beharko lituzkeen pausoak nirekin batera zehazten joango gara, poliki poliki. Eguraldi txarra dagoenez iragarrita, ezin izango dugu benetako proba bat egin aire librean... Baina, epeletan praktikatuko dugu kanpoan egongo bagina moduan, gerora norberak bere kabuz kanpora joaten denean eman beharko dituen pausoak zeintzuk diren jakin ditzan. Bestalde, afizio honetan interasa duen ororekin lehen kontaktuak egiteko ere aukera paregabea izan daiteke, eta tailer honen ostean edonolako zalantzak argitzeko edota astroargazkiak ateratzeko topaketa taldetxoak egiteko bideak ireki litezke. Aprobetxatu beraz aukera hau! Esan bezala eguraldiak ez du lagunduko, baina ez gelditu horregatik etxean! Ez da egunero astroargazkilaritzari buruzko klase praktiko bat euskaraz eta doan jasotzeko aukera izaten eta!! Sustatu.eus - Aktualitatea 2025/01/29 - 00:00:00